Во Паркот на поезијата во Струга денеска во 12 часот ќе биде засадено дрво во чест на македонскиот поет Влада Урошевиќ, годинашниот лауреат и добитник на „Златниот венец“ на Струшките вечери на поезијата. На платото пред Центарот за култура „Браќа Миладиновци“ во 20 часот со традиционално читање на „Т’га за југ“ и палењето на поетскиот оган ќе биде отворено 62. издание на поетскиот фестивал кој ќе трае до 28 август, а ќе се одржи под мотото „Чувствотворен јазик“.
Главните поетски читања ќе ги предводат повеќе од 25 странски и домашни поети од постарата и од помладата генерација. Ќе биде одржан поетски портрет на лауреатот Урошевиќ, на 26 август во катедралната црква „Св. Софија“ во Охрид.
Пред поетскиот портрет на Урошевиќ, во црквата „Св. Софија“ ќе се одржи свечен настан по повод јубилејот – 100 години од раѓањето на поетот Ацо Шопов, кој бил и претседател на првиот фестивалски одбор.
Чествувањето на Шопов ќе продолжи со изложба на фотографии поврзани со неговото учеството на „Струшките вечери на поезијата“ и неговиот придонес за основањето и развојот на фестивалот. Ќе бидат промовирани и негови преведени изданија на неколку јазици.
Годинашната програма предвидува и портрети на добитникот на наградата „Мостови на Струга“, Гевин Бредли и добитникот на наградата „Браќа Миладиновци“ за 2023 година, Димитар Башевски.
Во рамки на програмата на СВП ќе биде организиран специјален настан поврзан со настапот на избраните поети од платформата „Версополис“.
По повод јубилејот „200 години од раѓањето на Шандор Петефи“, во рамки на прогрмата на СВП ќе биде отворена изложба за животот и делото на овој унгарски поет.
Од СВП најавија и Тркалезна маса на тема „Поетскиот јазик и вештачката интелигенција“.
Во чест на јубилејот 60 години од востановувањето на наградата „Браќа Миладиновци“, оваа година ќе биде издадена Антологија за поезијата и флората, насловена „Меѓу дрвјата“ чиј приредувач е македонскиот поет и филозоф Иван Џепароски.
Програмата на фестивалот целосно се пренесува во живо на официјалниот јутјуб-канал на СВП.
Насловна фотографија: Архива на СВП
